Die Mundart der Grafschaft Glatz (Schlesien)

Inhaltsübersicht 2004

Monat, Jahr

Gedicht des Monats

Weihnachtsgedicht 2004

Weihnachtlicher Hauch

Dezember 2004

Doo staunt doas Volk

November 2004

Hoansla met der Zwelle

Oktober 2004

Herbstmaneever

September 2004

Was war, das war
Gesundheitsreform

August 2004

Ärntezeit

Juli 2004

Kärschkärnlan schissa

Juni 2004

Etz kemmt der Mai

Mai 2004

Maiandacht

April 2004

Frühlingsluft

März 2004

Der verstellte Sääjer

Februar 2004

Vu Foascheng bes Foaste

Januar 2004

Zweetausendviere

Neujahrs-Gedicht 2004

Neujoahrschwensche

Weihnachtsgedicht 2004

Weihnachtlicher Hauch

Kindlich, selig möchte erleben,
Ich den weihnachtlichen Hauch.
Kindlich, gläubig jenes Weben,
Wie in Kinderzeiten auch.

Spannungsvoll soll die Sekunde,
Rücken nur im Stundentakt,
Bis ein fröhlich Lied im Munde,
Mich im Innern tief gepackt.

Und im Jubelton soll's klingen:
„O, du schöne Weihnachtszeit!“
Immer noch kannst du uns bringen,
Sehnsucht, Hoffnung alle Zeit.

Erhard Gertler

Gedicht des Monats Dezember 2004

Doo staunt doas Volk

Doas Volk, doas Volk, es koan nee häärn,
Ma muuß a's hundertmoal derkläärn,
Die glääba 's nee, die glääba 's nee,
's langt henda on a vanna nee.

Es langt doch bloos fer die doo uba,
Doo bleit nischt nee fer die ei Stuba.
Die messa blecha, messa zoahla
On warn beschempft glei nooch a Woahla.

Wenn on die Stemme eigesackt,
Werd erschta rechtiech zugepackt.
Die braucha oall's fer ihre Oarbt,
Es schäärt se nee, wenn ääner doarbt.

Es ies on bleit doas Ungehääre,
Doas Volk kennt nee die Mengalähre.
Die loon siech oalls woas ies a bieta, -
Die frassa 's Ranftla, - jääne die Schnieta.

Derbei ies doas doch goar nee schwäär,
Die Änn hoan wennjer, die Andarn mähr.
Doas Volk, doas staunt doo goar nee schlecht,
Denn uubadruuf iss a nooch recht. -

Erhard Gertler

Gedichte des Monats November 2004

Hoansla met der Zwelle

Hoansla, nooch a klääner Schnacker,
A wing a Weps, a decker Packer.
A schackerte em's Heefla remm,
Ock hie on haar, ock remm on nemm.

Ar toat siech wie a Färschter fiehla,
Off Tauba on off Hienlan ziela,
- Doas Zwellalatzla fuul met Stäänlan, -
Schuuß ar nooch Tauba on nooch Hinnerbäänlan.

On weil doas „Schruutgewähr“ nischt broochte,
Ar änn Kanoonschuuß siech ausdoochte.
Sool denn doo nischt zo Traffa sein!?
A rechtjer Schuuß musst etza sein!

A grissrer Stään ei's Latzla koam,
Bevor ar on a Ziel siech noahm.
Schon fluuch doo em a Pfardestoal,
'n Spatzenschoar, ei gruußer Zoahl.

Doo schliech ar siech ganz sachte rao,
- Zielte, - sponnte, - leete oa! -
Bevor ar 's zweete Aaje uffgemacht,
Doo woar der Stään schonnt fatt gemacht.

Der Gummi vu daam Eiweckgloase,
Schnickte zorrecke off die Noase,-
Ar häärte ergend wuu woas Kläärn, -
On Hoansla fing glei oa zo flärrn.

Doas Stoalfanster, es woar ei Schärba.
- Der Voater watt 'm 's Falla gärba. -
Drem macht ar nemm zom Hinnerscheppla,
Der Voater koam, Hoans toat wie Teppla.

„Du Pärschla! Woas hoast Du gemacht!?
Doas Stoalfanster, es ies zerkracht!“
Em Hoansla zitterta die Bääne,
Ar Stotterte: „Allääne! Halt ällääne!“

Der Voater musste rechtiech lacha.
Es woar possiert, woas sullt ar'n macha? -
Ar noahm 'm Hoansla weg die Zwelle:
„'s ies gutt! 's ies gutt! Etz bies ock stelle!“

Erhard Gertler

(Zwelle, auch Zwiesel = Steinschleuder)

Gedicht des Monats Oktober 2004

Herbstmaneever

Ihr Loite, dreht etz rechtiech uff!
Doas Beßla Geld! Ach, plommp doo druuf!
Häärt bloß nee off doas Remgeploapper,
Die Rente, die werd emmer knoapper.
Doas Spoarn, es hoot doch goar kann Zweck,
Die letzta Zeetscher messa weg.

Weil ons der Staat oa's Laader gieht,
Denn dar hoot ooßiech Oppetiet.
Ar sefft on fresst zom Wahrverschieta,
Tutt noie Plooja ons uufbieta,
Ar ieberleet, on britt on britt,
Wu's wu zom Oaboahrn ärn woas gitt.

A, wenn ma woas eim Strompe hoot,
Doo wiel ar droa, schookschwääre Noot!
Ar macht der Jujend a känn Mutt,
Ma freet siech blooß, ies doas denn gutt? -
Wie sella die die Zukonft sahn? -
Woas soll ock waarn!? Woas soll ock waarn!? -

Sei mer denn wärkliech schon oam Ende?
Wu ies die Wende? Wu die Wende?? -
Koan's dar? - Koan's jerr? - Waar blooß? Waar?
Ma sitt derkroitze on derquaar.
On toappst wie blend doarch doas Gelände.
Fall't zom Erboarma blooß die Hände.

Es ies beim ganza Remmgeteever,
Geroade wie beim Herbstmaneever.
Ma schisst siech off a Wenter ei
On hofft off's Eis, - doas friert oalls ei.
Hofft, doaß on wenn doas Friehjoahr kemmt,
Oalls woas derfroarn dervoone schwemmt.

Erhard Gertler

Gedichte des Monats September 2004

Was war, das war

Menschen, ach, genießt das Glück,
Schaut doch öfter mal zurück!
Gedanklich, bildlich, auch durch lesen:
„Alles schon mal da gewesen!“

Wie sich heut die Bilder gleichen!
Neu sind nur die neuen Zeichen,
Welche da vorangestellt. -
Ist sie wirklich neu die Welt?

Menschen taten eh und je,
Andren Menschen immer weh.
Wer da oben, der war da,
Ganz egal was auch geschah.

Später, später, unverblümt,
Wird wer da war noch gerühmt.
Denkmal hie und Denkmal da,
Gleichgültig was einmal war.

Schweigen, Schweigen ohne Hehle,
Über die gequälte Seele.
Geschichtlich ist scheint's alles klar, -
Ach, was war, - das war, - das war.

Erhard Gertler

Gesundheitsreform

Ein Volk ist gesund!
Natürlich gibt's Schwund.
Ein Volk wird geschützt!
Was allen stets nützt.

Ein Volk wird behütet!
Versicherungs - vergütet.
Ein Volk wird getragen,
Von Hoffen und Klagen.

Ein Volk wird belogen!
Der Zukunft betrogen.
Ein Volk wird verwirrt!
Wer klagt hat geirrt.

Ein Volk es wird kritisch!
Denkt einmal politisch.
Ein Volk das sich wehrt!
Doch keinen es schert.

Erhard Gertler

Gedicht des Monats August 2004

Ärntezeit

Eim Schoata gelään,
Die Hetze verträän,
Emm gutt Waater gebatt,
Off die Frechte gewatt.

Woas der Herrgoot gegaan,
A reifa gesahn.
Doas Queela vergassa,
Woas gewaxa gegassa.

's ies wie emmer gelonga,
Fer die Aala, die Jonga! -
Och, wenn se ock kennda,
Zosaomma siech fenda!

On sahn, - wie doas waan,
- Wie's emmer geschaan, -
Nee ohne zo Schenda,
Ies zom Kranze zo wenda.

„A Menscha zom Glecke,
Fiehr oalles zorecke,
Du Herrgoot, tu Rechta,
Eim Laaba oall's Schlechta.

Vu uuba nooch onda,
Haal oalles gebonda,
Derkroitz on derquaar,
Ämoal hie, ämoal har!“

Erhard Gertler

Gedicht des Monats Juli 2004

Kärschkärnlan schissa

Nä, woas hoammer oalls gemacht,
Wu ma hoite drieber lacht,
Woas de ei Derrenronrong bleit,
Aus der schiena Kärschazeit!

Bei daan ärschta ruuta Backa,
Mußt mer schonnte nooch a packa,
Denn mer woarn nemme zo haala,
Mußta einfach Kärscha stahla!

Ob beim Nockwer, - oder wu,
Kamm änn Baam ließ mer ei Ruh.
Nooch a Ästa wur' gepackt
On die Toascha vuul gesackt.

Woarn's doch ärschte Sommergrisse,
Herzhoaft! Soaftiech on a sisse!
Die ei's Guschla neigerutscht
On vum Koarne roagelutscht.

Schließliech mußte ma a lärnna,
Woas on macht ma met a Kärna?
Nonderschlucka därf ma nee,
Also fend ma 'n andarn Dreh.

Rechts on links ei beede Backa,
Toat mer sche ärscht amoal packa.
On dann wurde unverdrossa,
Koarn, em Kärnla fattgeschossa.

A off Ziele, met'm Fenger,
Schnippt mer fatt die glitschja Denger.
Spaaß hott mer ei jedem Foalle,
Bes on die Monition woar oalle.

Och, du schiene Kärschazeit,
Lei'st doch hoite goar zo weit!
Nä, mier hoan diech nee vergassa,
Wenn mer hoite Kärscha assa.

Erhard Gertler

Gedicht des Monats Juni 2004

Etz kemmt der Mai

Etz kemmt der Mai!
Macht Euch frei!
Macht Euch frei vu oalla Sorja,
Schinner werd a jeder Morja,
Denn met jeder lenda Nacht,
Wacht se uuf die Blietapracht.

Se strahlt on winkt ei oalla Ecka,
Nischt tutt siech ärn doo verstecka,
Denn a jedes Bliemla mecht,
Zeija, wie es lockt on lecht.
Wie's on blieht eim Sonnaschein,
Wiel halt miet derbeine sein.

Derbei sein ei der Mäaloft,
Off die gewatt se on a gehofft.
On jedes Bliemla, jedes Pflänzla,
Macht vu Frääda schier a Tänzla:
's ies Mai! 's ies Mai!
Die Nuut verbei.

Neues Laaba, neues Waan,
Hoot der Herrgoot ons gegaan!
Fräät Euch oalle! Fräät Euch druuf!
Denn die Knospa plotza uuf,
Zeija oalls ies schien on gutt,
Wenn ma rechtiech hiesahn tutt.

Erhard Gertler

Gedicht des Monats Mai 2004

Maiandacht

Zor Maiandacht die Glocke lett,
Vom Kärchla datte donda.
Der Kister hoot oalls vierberett,
Die Lichtlan oagezonda.

On bonte Bluma, ääne Pracht,
Die lechta vum Oaltoare!
Die Orjel wird glei uufgemacht,
Schon pischperts off'm Chore.

A Gläckla klengt, Menstranta komma.
Där Pforr met wärdja Schrieta.
Die Orjel braust, wie tausend Zonga,
Nischt ies zo ieberbieta.

Dann gieht a Baata on a Senga,
Eim klääna Kärchla nieder.
„Maria!“ tutt's ock emmer klenga,
Die preisa oalle Lieder.

Die bieta se, die baata se,
Ihr sään se oalle Sorja.
Ei Hoffnong fer se traata se:
-' s werd emmer wieder Morja. -

On leise klengt's goar ennigliech,
Doarch's Kärchla ei daam Omde.
A jeder fiehlt geborcha siech,
Em Himmel rechtiech nohnde.

Erhard Gertler

26.02.1986/überarbeitet 21.03.2004

Gedicht des Monats April 2004

Frühlingsluft

Frühlingsluft! Frühlingsluft!
Überall Blütenduft.
Überall Sonnenschein,
Herz, nun kannst du fröhlich sein.

Graue Zeit ist vorbei,
Horch, der erste Kuckuckschrei!
Schon die Lerche jubiliert,
Fink und Drossel triumphiert.

Weibchen, Weibchen wird gesucht,
Denn beginnen soll die Zucht.
Im Gebüsch und hinterm Zaun,
Nestchen bau'n! Nestchen bau'n!

Welch ein Weben! Welch ein Streben!
Welch ein hoffnungsvolles Leben!
Mensch, du darfst nicht traurig sein,
Hak dich ein!

Hak dich ein ins volle Treiben!
Nichts von Gestern soll noch bleiben,
Frühlingsluft! Frühlingsluft!
Herz wach auf, das Leben ruft!

Erhard Gertler

Gedicht des Monats März 2004

Der verstellte Sääjer

Nä, ar teckte emmer rechtiech,
Onser Sääjer, dar woar wechtiech,
Denn ma kund siech druuf verloon,
Seine Pflecht hoot ar getoon.

Erscht woarsch ääner, dar droa stellte,
- Weil ar foalsche Zeita meld'te,-
Ar ging avier, ar ging annooch,
Oaber, 's ging halt äben nooch.

Bes a Andrer droa probierte
On daan Sääjer reparierte.
Dar hätte doo woas ieberbreckt!
Etza schleet ar wie verreckt.

Macht aus äänem Värtelstindla,
Ofte goar a vuules Stindla,
On ma denkt, ar wiel änn reiza,
Wenn's 'm eifällt, schleet ar dreiza!

Dann hoan nooch andre droa gedreht,
Etz scheint der Sääjer ganz verdreht.
Ämola lääft ar wie der Teifel,
Danne hoot ar salber Zweifel.

Häärt off ämoal uuf zo tecka,
Oam ganza Uhrwerk häärt ma'n recka,
Ar wiel halt nemme rechtiech giehn
On oam Ende bleit ar stiehn.

Der Perpanteckel, dar stieht stelle,
Ohne Mutt on ohne Welle,
Scheint der ganze Sääjer hoite:
„Na, doo halft ock! Halft Ihr Loite!“

Onser Sääjer hoot änn Teck,
Asu wie onse Poleteck!
Wenn ma emmerfatt droa stellt,
Ies der Sääjer schnell verstellt.

Erhard Gertler

Gedicht des Monats Februar 2004

Vu Foascheng bes Foaste

Du liebe Zeit! Du liebe Zeit!
Etz iss se doo die noarrsche Zeit.
Der Foascheng da ies eigelett,
Seid Ihr'n oalle vierberett?

Hott'ern schon die noarrsche Koppe?
Oder zieht Ihr goar 'n Floppe?
Guckt 'ern a daam Droasche zu?
Säät 'ern Vleicht: „Lott miech ei Ruh!

Doas Gehoppe, doas Geloarber,
On derzu doas Remgespoarber.
A die, doo hoalb nackich tanza,
Kriecht ma schnelle fer die Wanza.

's ies doch bloos a Lämentiere,
Gibts nischt andersch doo derfiere,
Woas de ei Derennrong bleit,
Vu der femfta Joahreszeit?“ -

Ausgeteebst on ausgetollt,
Laargebrannt on miede vollt,
Der Oaschermietwoch reckt azu,
On die Seele kemmt zor Ruh.

Nä, 's woar wieder tolle heuer,
Moancher Spaaß woar viel zo teuer,
On wenn ma's etza rechtiech nemmt,
Werds Zeit, doaß de die Foaste kemmt.

Oalles, oalls hoot seine Zeit,
Der Foascheng, wie die Foastazeit.
Senn on Zweck ei oallem leit,
Wenn ma off'm Teppiech bleit.

Erhard Gertler

Gedicht des Monats Januar 2004

Zweetausendviere

Doas Neue Joahr stiht viir der Tiire,
Mier schreiba etz zweetausendviere.
Die Taage recka schnell azu,
Die Zeit verfliecht halt wie eim Nu.

Doas woar asu, zo oalla Zeita,
On kääner watt doas a bestreita.
Ma schielt met jedem Aajablecke,
Off's Neue on guckt a zorecke.

Woas gestarn woar, doas ies verbei,
Ei's Hoite sterz mer ons etz nei.
Mier hoffa halt, doaß gutt ward warn,
Na, wie's on wird, doas wa mer sahn.

Met Zuversecht on Gootvertraun,
Well mer doas Neue Joahr uufbaun.
A jeder Taag hellt woas verstackt,
Die Hauptsache, doaß ma'n a packt.

„Zweetausendviere“, wa mer nahma,
Blooßiech vu guuda Zeita traama!
Doas werd asu, doas ies doch kloar!
Euch oalla drem, „a guudes Joahr!“

Erhard Gertler

Neujahrs-Gedicht 2004

Neujoahrschwensche

Viel Glecke! Viel Glecke!
Doarchs Joahr Steck' fer Stecke,
Gesondhäät on Frääda
On blooß nischt zo Lääda.

Jeda Taag woas zo Macha,
Jeda Taag woas zo Lacha,
Änn Saakvell met Geld
On 'n ruhiche Welt.

A Herrgoot zom Bieta,
Doo koan nischt verschieta.
Ar watt oalles rechta,
Wenn's sein muuß a schlechta.

Vertrau mersch 'm oa
On giehns miet 'm oa!
Wie emmer? Nu kloar!
Ei Goots Noama, - doas Joahr.

Erhard Gertler